Rheinhessische Weihnachtsbäckerei

Es riecht sou gut noo Marzipan un Zimt, doudroo merkt mer, dass‘s Chrischtkinnche kimmt.
Ich merks aa in de Kich, des is e Groußbäckerei, dou leijen die Blech, die Bensel un die Dreht glei debei.
Dou schdäiht de Zucker, die Butter, ‚s foigesiebt Mehl, 
aa die Oijer vum Bauer, vor de Woihnachte besonners geel.
Kokosflocke, Oblade, Nougat un Zimt, des brauch ich in gräißere Menge bestimmt.
Schokelad un Niss un kandiertes Frichte-Allerlei, roure Kersche zum Beläije soin aa debei.
Schoko-Herzja un Dreppelcher, Rosine in Rum, all des leit in verschiedene Dittscher rum.
Im Kerbsche die Zitrone un aa die Abbelsine, vepackt noch die Korinthe un aa die Sultanine.
Zitronat, Orangeat imme kloone Käschtsche vepackt, 
des is zwaar babbisch, awwer – Gott sei Dank – schunn gehackt.
Sou, dou leijen jetz die Utensilie erum, fang ich also oo: Zeerscht kimmt bei meer des Schbritzgebackene droo.

Spritzgebackenes

Was es Schbritzgebackenes mit allerlei Finesse? Moi Oofaches werd doch am liebschde gesse,
des schdäit imme alde Kochbuch aus de 20er Johrn, noch vun meine Mudder:
1 Pund Mehl, 1/2 Pund Zucker, 2 Oijer, 1/5 Pund Niss und 2/5 Pund Budder.

Grießmakrönle

Dieselwe kummen aus em Schwoweland, soin vleicht in unsane Gäijend no sou bekannt.
4 Eiweiß, 2 Vanillzucker, 1/4 Pund Grieß, 1/2 Pund Zucker orra aa wenicher, dass se net sou sieß.
1/5 Pund Mandele kummen aa noch dezu, dann die Häifscher uffs Blech, iwwer Nacht missen se ruh.

Sou mach ich an die 15 Sorte: Zimtstern, kalte Hunde un aa Makrone.
Langt mers immer noch net, verschaff ich Dattle un Feische, dou muss dann sogar de Lebkuche weiche.
Doch wann ich dann ferdisch bin, loss ich alles ringserum schdäi, 
betracht moi Gebackenes un finns zum Noibeiße schäi.
Un wann ma koons faliert es, fa mich die gräischt Fraad – dou klopp ich mer uff die Schulder:
Des hoscht gut gemacht, moi Maad.
So hot jeder en annere Tick, ich finn ewe beim Backe moi allergräischt Glick.

Von Maria Kern (ehem. Landfrauen Hamm)
Bild: © Couleur/Pixabay